കഥയിൽ മതിലുകളും പ്രേമലേഖനവും ജന്മദിനവും ശബ്ദങ്ങളും ഇല്ലായിരുന്നുവെങ്കിൽ, നോവലിൽ പാത്തുമ്മായുടെ ആടും ബാല്യകാലസഖിയും ന്റുപ്പുപ്പാക്കൊരാനണ്ടാർന്നും സ്ഥലപുരാണവും ഇല്ലായിരുന്നുവെങ്കിൽ, കവിതയിൽ അനർഘ നിമിഷവും സിനിമയിൽ ഭാർഗ്ഗവീനിലയവും ഇല്ലായിരുന്നുവെങ്കിൽ മലയാള സാഹിത്യത്തിനു നഷ്ടമാ‍വുന്നത് സ്വപ്നത്തിലേക്ക് വിവർത്തനം ചെയ്യപ്പെട്ട സമഗ്ര ദർശന ഭാഗ്യമാവുമായിരുന്നു.
സാഹിത്യ പാരമ്പര്യങ്ങളൊന്നുമില്ലാത്ത, വലിയ പഠിപ്പില്ലാത്ത, ഭാഷ പരിജ്ഞാനമില്ലാത്ത ഒരു മനുഷ്യൻ വിശപ്പുകൊണ്ടും ഏകാന്തതകൊണ്ടും ഭ്രാന്തുകൊണ്ടും ധ്യാനം കൊണ്ടും സ്വപ്നസമ്പന്നമാക്കിയ അപൂർവ്വ ചരിത്രമാണ് മലയാള കഥയുടേത്. അനുഭവങ്ങൾക്ക് ഭാവനയുടെ നിറവും ജീവിതവും നൽകി മരുഭൂമിയുടെ കൂടാരങ്ങളിൽ പണ്ട് കഥ പറഞ്ഞിരുന്ന യാത്രികന്റെ ചാതുരി മാത്രമെ തനിക്കുള്ളൂ എന്ന് ബഷീർ വിശ്വസിച്ചിരുന്നു.
സഫലമായ ആ ജനനത്തിന്റെ നൂറാം പിറന്നാൾ പിന്നിടുന്ന ഈ അവസരത്തിൽ മസ്കറ്റും ഇവിടുത്തെ മലയാളി സമൂഹവും ആ സ്മരണയുടെ ദീപ്തി ഏറ്റുവാങ്ങാൻ ഒരുങ്ങുകയാണ്.
കേരളാ സാഹിത്യ അക്കാദമിയും ഇന്ത്യൻ സോഷ്യൽ ക്ലബ്ബ് (കേരളാ വിങ്ങ്)ഉം സംയുക്തമായി സംഘടിപ്പിക്കുന്ന ബഷീർ ജന്മശതാബ്ദി ആഘോഷങ്ങൾ 16/01/2009 വെള്ളിയാഴ്ച മസ്കറ്റ് , ദാർസയ്ത്ത് ഇന്ത്യൻ സ്കൂൾ ഓഡിറ്റോറിയത്തിൽ വെച്ച് നടക്കും.
രാവിലെ 9 മണിക്ക് തുടങ്ങുന്ന സെമിനാറിൽ സാഹിത്യ അക്കാദമി വൈസ് പ്രസിഡണ്ടും പ്രമുഖ എഴുത്തുകാരനുമായ ശ്രീ കെ.ഇ. എൻ. കുഞ്ഞഹമ്മദ് മോഡറേറ്ററായിരിക്കും.
പങ്കെടുക്കുന്ന മറ്റുള്ളവർ:-
ശിഹാബുദ്ദീൻ പൊയ്ത്തുംകടവ്
ഷാജഹാൻ മാടമ്പാട്ട്
വി. മുസഫർ അഹമ്മദ്
ജോയി മാത്യു
ഇ.എം. അഷ്‌റഫ്
എൻ.ടി. ബാലചന്ദ്രൻ
ആൽഫി ഹിഷാം
അവതരിപ്പിക്കുന്ന പേപ്പറുകൾ.
ബഷീർ എഴുത്തും ജീവിതവും
പ്രവാസിയായ ബഷീർ
ബഷീറിന്റെ സിനിമയും നാടകവും
ബഷീറിന്റെ മതവും ആത്മീയതയും
ബഷീറിന്റെ സ്ത്രീ കഥാപാത്രങ്ങൾ
സെമിനാറിനു ശേഷം ബഷീറിന്റെ ജീവിതത്തെ ആധാരമാക്കി എം.എ റഹ്‌മാൻ സംവിധാനം ചെയ്ത ‘BASHEER THE MAN' എന്ന ഡോക്യുമെന്ററിയുടെ പ്രദർശനവും ബഷീറിന്റെ മുഖ്യ കഥാപാത്രങ്ങളെ ഉൾക്കൊള്ളിച്ചു കൊണ്ടുള്ള ‘മരുഭൂമികൾ പൂക്കുമ്പോൾ’ എന്ന സ്കിറ്റും ഉണ്ടായിരിക്കുന്നതാണ്.
വൈകിട്ട് 6 മണിക്ക് നടക്കുന്ന പൊതുസമ്മേളനം സാസ്കാരിക മന്ത്രി എം.എ ബേബി ഉദ്ഘാടനം നിർവ്വഹിക്കും. പ്രമുഖ എഴുത്തുകാരനും സാസ്കാരിക വിമർശകനുമായ പ്രൊഫ. സുകുമാർ അഴീക്കോട്, എഴുത്തുകാരനും സാഹിത്യ അക്കാദമി പ്രസിഡണ്ടുമായ ശ്രീ. എം. മുകുന്ദൻ, എഴുത്തുകാരായ ശ്രീ കെ.ഇ. എൻ. കുഞ്ഞഹമ്മദ്, ശ്രീ പുരുഷൻ കടലുണ്ടി തുടങ്ങിയവരും സംബന്ധിക്കും.
സെമിനാറിൽ പങ്കെടുക്കാൻ ആഗ്രഹിക്കുന്നവർ രജിസ്ട്രേഷനും മറ്റു വിശദ വിവരങ്ങൾക്കും താഴെ പറയുന്ന നമ്പറുകളിൽ ബന്ധപ്പെടേണ്ടതാണ്.
00 968 99315034 / 99656896
